Badaude beste gai batzuk, aldiz, ez direla hainbeste hobetu. Horien artean, bi aipatuko nituzke: ingelesa eta teknologia. Ingelesari dagokionez, harrigarria da txiki-txikitatik –aurre-eskolatik– ingelesa ikasten egon arren, oso gutxi direla benetan ingelesa menperatuz enpresara iristen diren pertsonak.
Teknologiari dagokionez ere espero zitekeena baino gutxiago aurreratu dugula uste dut; batez ere, tekno txikienei emateko orduan. Harrigarria iruditzen zait gaur egun oraindik zenbait kasutan tekno zuri-beltzeko fotokopien bidez erakustea, antzinako makina eta erreminta zaharren izenak buruz ikasteko helburuarekin.
Egia da robotika ikasgaia ere aukeran dutela ikasle askok –zoriontzekoa, benetan, Lego roboten txapelketan zenbait ikastetxe, irakasle eta ikasle egiten ari diren lan bikaina–, baina garrantzitsua iruditzen zait gazteek teknologiarekin ikasgai moduan duten lehen esperientziak ahalik eta erakargarrien, erabilgarrien eta interesgarrien egitea, oso garrantzitsua izan baitaiteke etorkizunean egin dezaketen aukeretan. Zenbait teknologiarekin lotutako profesionalen gabezia larria dugu enpresa askok gure inguruan. Behar-beharrezkoa dugu gazteak ikasketa teknikoetara erakartzea, eta, horretarako, tekno ikasgaia funtsezkoa izan daiteke, zentzu batean edo bestean, eta, beraz, jarrai dezagun hobetzen guztion laguntzarekin eta guztion onerako.