PPren eta PNVren arteko akordioa: argitu beharrekoak

Erabiltzailearen aurpegia Jose Antonio Amundarain 2018ko mai. 5a, 00:00

PPk eta PNVk adostu duten akordioa 2018rako eta 2019rako bakarrik izango da. Gero, %0,25era bueltatuko gara, ez da ziurtatzen aurrera begira pentsioak KPIaren arabera balioberrituko direnik. Ez da baliogabetzen PPren erreforma. Eros ahalmena ez da errekuperatzen akordioaren ondorioz. %0,25 ezkutatu egiten da 2 urterako, hauteskundeak datozelako, interes alderdikoiagatik.

Pentsio baxuen arazoak berdin jarraitzen du. 247.000 pentsiodun dira hilean 700 eurotik behera jasotzen dutenak; hau da azpi-azpian dagoen benetako auzia.

Gutxieneko pentsioa 1.080 eurokoa izan dadila eskatzen jarraitzen dugu. 310.000tik gora pentsiodunek jasotzen dute 1.080tik behera, %56,6k.

Bere pentsioaren osagarria DBE (RGI) kobratzen duen Euskal Autonomia Erkidegoko pentsiodun batentzat, PPk eta PNVk lortutako akordioak ez du eragin ekonomikorik.

Gehienez, DBEk bizikidetasun unitateko pertsona batentzat ematen duen 732,38 eurora hel daiteke.

PNVrekin paktatutako %1,6ko igoerak eta Ciudadanosekin paktatutako %2ko eta %3ko igoerak ez diete eragingo orain 639,30 euro dutenei –pentsioa gehi gutxiengo osagarria–, absorbiblea delako.

Eta ez die eragingo 639 euro baino gutxiago kobratzen duten alargunei; %40 Euskal Autonomia Erkidegoan eta %54 Nafarroan.

Pentsio altuenak kobratzen dituztenek bai –hilean 2.580 euro–, horiek izango dute igoera ederra, 40 euro baino gehiago hilean.

Iraunkortasun faktorea, oraingoz, 2023ra arte atzeratzea proposatzen da, baina ez da baliogabetzen. PSOEk, 2011ko erreforman, iraunkortasun faktorea 2027rako ezartzea eskatzen zuen.

Harrotuta dabiltza PNVtarrak, egin duten akordiori esker pentsiodunen arazoak amaitu balira bezala, baina lehen bezala gaude. Espainiako aurrekontua ez da onartu, eta, onartzen badute ere, ez da ezer konponduko. Arazoa atzeratu besterik ez dute egin. Gaurko ogia, biharko gosea.

Bitartean, Euskal Autonomia Erkidegoan, hor daude 247.000 pentsiodun, bizirik irauteko kalamidade ugari pasatzen ari direnak –emakume alargunak, batez ere; beste guztiak ahaztu gabe–.

Mobilizatzen jarraitu beharra dago, egiteko asko geratzen delako: 1.080 euroko gutxieneko pentsioa eta hemengo bertako sistema publikoa lortzea.

----------

Jose Antonio Amundarain, Alberto Etxeberria, Xabier Oregi, Javier Kortabarria, Josemari Iciar eta Miguel Martin

Duintasuna taldea

Oñati

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak