Talent-show horretan musikarekin lotutako hainbat alor jorratzen dituzte asteroko galan emanaldi dotorea egiteko: ahots-teknika, kantu korala, fitness-a, interpretazioa…
Reality-ak baditu plataforma, dirua eta azpiegitura ospea lortzeko. Horretaz gain, musikak ikuslea harrapatzen duela ere agerikoa da. Baina eman diezaiogun buelta honi: ikusiko al zenuke idazleen talent-show-rik?
Dagoeneko imajina ditzaket 16 sasi-idazle akademia barruan. Ahots-teknika beharrean, idazketa-teknika landuko lukete; kantu koralaren ordez, idazketa kolektiboa, kaligrafia eta sormena; fitness-a, batez ere, hatzen entrenamenduan zentratuko litzateke, eta idazteko postura egokienen inguruan hitz egingo litzaieke.
Asteroko galarako, berriz, idazle bakoitzari erronka bat jarriko litzaioke: hileta baterako gutuna, pazientearen txostena, lehendakariaren mitina, argiaren faktura edo eleberri hasiera bat E hizkia erabili gabe. Euskal kulturako hiru kidek osatuko lukete epaimahaia, eta astero idazle gonbidatu bat etorriko litzateke. Irabazlearen saria? Durangoko Azokaz libratzeko aukera.
Nik, behintzat, ikusiko nuke.
