Baina gurean ere baditugu ezezagunak bezain garrantzitsuak diren feminista eredugarriak. Maria de Maeztu, Julene Urzelai, Elbira Zipitria eta Maria de Cortazar oñatiarra, besteak beste.
Feminismoa deserosoa da, batez ere, dagoen ordena aldatzera datorrelako. Ezarritako egitura ondo dago jarri zutenentzat; hau da, hortik onurak dituztenentzat. Feminismoa ez da bestelako teoria bat, baizik eta emakumeen eta gizonen arteko harremanak eraldatzen dituen motorra.
Euskal kanta ezagun bat oinarri hartuta, ama-alabak jokotik irten eta aita- semeekin batera tabernan, espazioa konpartitzeko unea da. Emakumeek eremu publikoan lidergoa hartzeko garaia da, betiere, emakumeen arteko elkartasuna eta politika publikoak lagun izanda.
