Jakin badakigu, estatistikek hala erakutsita, emakumeok gizonek baino bizi-iraupen luzeagoa dugula. 2020ko Eustat-en datuei erreparatuz, jaiotzen %49 neskak izan ziren, eta nahiz eta 70-74 urte bitarte arte bi generoen parekotasuna mantendu, 85 urtetik gorakoen artean %67 emakumeak ziren. Alegia, portzentaje orekatuekin hasi arren, adinak gora egin ahala emakumea gailentzen da gure biztanlerian.
Baina zein da euskararen erabileraren bilakaera adinaren eta generoaren arabera? Guztiz kontrakoa: datu desorekatuetatik abiatuta, pareko emaitzak lortzeraino, zoritxarrez. 2019ko estatistiken arabera, LH-4n dena edo gehiena euskaraz egiten zuten neskak %35,6 ziren; mutilak, ordea, %29,5. Adin-piramidean aurrera egin ahala, aldiz, nesken euskara-erabilera horrek nabarmen egiten du behera. Horrela, DBH-2ko datuei erreparatuta, nesken %16,5ek eta mutilen %15,5ek erabiltzen dute gehienbat euskara. Zergatik ote?
