Ghibli estudioren talentuak ukaezina eta amaigabea dirudi, eta The boy and the Heron horren erakusle garbia da. Fantasia, irudimena, poesia... Miyazakik ohiko tresnei eskutik helduta sortutako istoria ekarri digu Zinemaldira. Hamar urte pasa dira Miyazakik bere aurreko pelikula sortu zuenetik, eta askorendako zuzendari japoniarraren azken lana izan daitekeen honetan erraz ikusten dira bere ibilbidean zehar erabili dituen elementu nahi pertsonai ugari.
Mahito izeneko mutiko bat da filmeko protagonista. Ama sute batean hil da, eta aita eta bera Tokiotik landa eremuan dagoen etxalde batera joango dira bizitzera. Beste pertsonaia batzuen artean, koartza bitxi batek egingo dio bisita mutikoari. Eta, haren atzetik doala, fantasiazko mundu batean bete-betean murgilduko da Mahito. Biziak eta hilak, animaliak eta gizakiak, errealitatea eta ametsak nahasten diren mundu batean. Hain zuzen, bizitzari, heriotzari eta irudimenari buruzko fabulatzat har daiteke Miyazakiren filma, kutsu autobiografikoa ere izan dezakeena.
Bossa Nova baino gehiago
Fernando Trueba zinemagileak eta Javier Mariscal marrazkilari, diseinatzaile eta irudi-sortzaileak elkarrekin lan egin dute azken urteotan, 2011ko Chico & Ritaren ondoren. Bikoteak oraingo honetan musika erabiliko du istorioaren ardatz gisa, baina sinetsi iezaidazue, They shot the piano player hori baino askoz gehiago da.
Truebak eta Mariscalek idatzi dute filma, eta kontakizunak ikuslea hirurogeiko hamarkadako Brasil eta Argentinara eroateaz gain, gaur egungo Estatu Batuetara ere bidaiaraziko dio. Guzti honen lotura Jeff izango da, 1950eko eta 1960ko hamarkaden artean Brasilen musika berriak izan zuen mugimenduari buruzko liburua idazten ari den kazetari estatubatuarra. Bossa Novaren sustraien bila dabilela, Tenório Jr-en istorioarekin egingo du topo, eta hark aurreikusitako guztia aldaraziko du.
They Shot the Piano Player-ek orainetik iraganera garamatza, XXI. mendeko New Yorketik hirurogeiko hamarkadako Rio de Janeirora edo 1976ko Buenos Airesera, militarren estatu-kolpearen egunetan, genero eta musiken puzzle batean. Thriller politiko bat da, dokumental biziduna eta musikaz beteriko abentura, non Bossa Novako pertsonaia handiek desfilatzen duten. Azken finean, beharrezko memoria historikoari buruzko film baten aurrean gaude, indarkeriaren gaitzespena eta artearen eta bizitzaren ospakizuna, besteak beste, lantzen dituena.
