Kontu hau pil-pilean zela, hara non eta bertsolari ospetsu batek botatako bertsoek harrotu dituzte bazterrak. Txertoa jarri ez dutenei errespetua eskatzen zuen; bera barne, baina, aldi berean, jarri dugunoi industria farmazeutikoaren txotxongilo deitzen zigun. Nik guztiz errespetatzen dut txertoa jarri ez duen jendea, guztiz ados nago ezin dela inor behartu eta inor estigmatizatzearen aurka nago, baina nik ere errespetua eskatzen dut; txertoa jarri badut, zientzian sinesten dudalako da eta ez dut onartzen inoren morroi izatearen iraina. Iritzi guztiak dira onargarri, baina kontuan izanda iritziak hori direla, iritzi, eta ez besterik. Zientziak egiak bilatu eta demostratzen ditu, eta egiek iritzien gainetik egon behar dute gizarte hobe eta justu baten eraikuntza prozesuan. Lurra ez zela laua edo eguzkia sistemaren erdian zegoela ez ziren iritziak izan, baizik eta zientziaren bidez aurkitutako egiak, eta horrela egin dugu aurrera. Ez ezazu ahaztu, bertsolari jauna, zure esanak, errespetagarriak izanda ere, iritziak direla eta egiak zientziak aurkitzen dituela, zientzia errealitatearen azalpena delako.
Lehenik eta behin, nire miresmena eta begirunea lehen arretako mediku, erizain eta profesional guztiei, eurek eusten diotelako gure osasun sistemari. Hau esanda, pare bat konturekin natorkizue. Gabon-aurrean hasi ginen lehen arretako osasun sistema indartzeko eskatzen ziren manifestazio eta kontzentrazioekin. Lan-kontuak tarteko, bertara hurbiltzeko gogoz gelditu nintzen, baina nire ordez herritar asko bildu ziren eta asko poztu nintzen. Hainbeste herritar kontzientziatu izanda lasai nengoen, Gabonak gainean izanda jendeak zuhurtziaz jarraituko zituela hainbeste babesten zituen lehen arretako langileak, eta hauen esanak txintxo jarraituko zituela; hau da, ahalik eta jende gutxienarekin jaiak ospatu, jende pilaketak ekidin, konfinamenduak zorrotz bete, kalean zurrutean ez ibili eta, batez ere, musukoa erabili. Musukoa delako gizartea sozialistago egiten duen elementua; denok berdinago egiten gaitu eta norbere erosotasuna albo batera utzi eta gizartearen hobe beharrez jarduten dugu; bakoitzak nahi duena egin dezala aldarrikatzen duen aldarri neocon liberalaren aurrean. Nik uste nuen euskal gizartea gero eta sozialdemokratagoa zela, baina ez dirudi; uste dut oraingo kontzentrazioak balkoietako txaloen bigarren zatia izan direla.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.
Harpidetza aukera guztiak