Errukia

Erabiltzailearen aurpegia

Hurbil gertatu izanagatik, nire gain eragina izan duen pasarte bati buruzko gogoeta bat azalduko dut. Urriaren erdialdean, Euskal Herriko Unibertsitateko ikasle batek eraso egin zien Zientzia eta Teknologia Fakultateko eraikinari eta bertan zeuden hainbat gailu eta tresnari, eskopeta batekin tiro eginda. Gurean ez gaude ohituta leku publikoetan horrelako portaerak ikustera, eta gertaerak izugarriko izua sortu zuen, lehenik, eta ondoren, harrabots handia izan zuen komunikabideetan. Bolo-bolo ibili zen pasadizo hura eta gauza asko ikusi eta entzun nituen pasarte haren inguruan.

Lehenik eta behin, Ameriketako Estatu Batuetan sarri ikusi ditugun arazoekin parekatzen zuen jende gehientsuenak, eta ondoren etorri ziren bakoitzaren iritzi eta jakin-nahiak. Egia da guztiok izaten dugula ulertezintzat zaigun horrelako portaera baten aurrean sakonean dagoen motibazioa jakiteko nahia. Galdera asko zeuden erantzuteko: zergatik egin zuen? Zer nahi zuen lortu? Nola lortu zuen eskopeta bat? Eta abar.

Hasierako informazioaren arabera, argi zegoen, hasiera baten uste zen moduan, erasotzaileak buruko gaitz garrantzitsua zuela. Hori horrela izanik, nire lehen sentimendua errukia izan zen. Gaixo dagoen pertsona baten egoerak tristura sentiarazten dit, baina, itxura denez, guztiok ez gara berdinak. Hainbat kazetarik erasotzailearen arlo pribatuan arakatzen jarraitu zuen eta zenbait kontu ilun argitaratu ziren.

Egun haietan, autobus bat hartu nuen, eta bertan hainbat ikasle zihoazen; hauek barrez eta isekaz irakurtzen zuten egunkari jakin bateko erasotzailearen profila. Hori gutxi ez, eta Unibertsitateko irakasle batek bere sare sozialetan burla moduan armen erabileran trebatzen ari zela jarri zuen. Non dago arazo bat duen pertsona batekin enpatizatzeko gaitasuna? Ikaskideen elkartasuna? Irakaslearen sentiberatasuna? Egungo erronketariko bat hezkuntzaren humanizazioa zela uste nuen.

Gizaki solidario eta konprometituak heztea da hezkuntza sistemaren oinarrietariko bat. Euskal Herriko Unibertsitateak berak duen ikaskuntza sistemak berak irakaskuntza kooperatibo eta integratzailea bultzatzen du, baina ez dakit helburuak lortzetik urrun ez garen geratzen ari eta asmoak paperean baino ez diren gelditzen ari.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.