Eduki hau partekatzeko esteka arbelera kopiatu da.
Euskararen erabilera datuek emakumeek* euskara gehiago erabiltzen dutela adierazi izan dute. Baina, askotan, adin tartean jartzen da fokua, ondorengo ondorioak ateraz: haurrek lehen baino gutxiago egiten dute edo nerabeek ez dute erabiltzen bezalako konparatiboak entzun ohi ditugu. Genero rolei erreparatuz gero, gizonok* zaurgarritasunak ezkutatzeko hezi gaituzte herriak, eskolak, familiak eta abarrek, eta emakumeak*, berriz, zaurgarritasun horiek zaindu eta onartzeko.
Hizkuntzaren biziberritzearen ardura, aldiz, haurrengan jartzen dugu, eta maskulinitatearen errebisioa ere gakoa izan daiteke prozesu honetan aurrerapausoak emateko. Atzera begira jarrita, zenbait praktika konkretuz ohartu naiz: eztabaida sutsuetan murgilduta gaudenean eta gure arrazoia indartu nahi dugunean, gaztelera ahoratzen zaigu; eta bailara honetan oso ohikoa den eta gogortasuna ardatz duen estiloa erreproduzitzeko hizkuntza gaztelania da ohikotasunaren barruan sartzen dena.
Zaurgarria dena zaintzeak indartu egiten gaitu, pertsona, kolektibo eta jendarte gisa. Baita euskara bera ere.
