Gizartea etengabeko mehatxu honi erantzuten ari zaio; hainbat erakunde eta plataforma sozial eta herritar batu gara berriro ere kalera ateratzeko, astakeria honi ezetz esateko. Erakundeei eta arduradun politikoei erakutsi nahi diegu lurraldea, gure herriak eta landa inguruneko bizimodua defendatzen ditugunak gehiengoa garela. Horregatik, datorren urriaren 26rako, larunbata, manifestazioa deitu dugu Gasteizen, arratsaldeko seietan, Bilbo plazatik abiatuta.
Manifestazio honekin, honako hau exijitzen dugu:
- Aipatu makroproiektu horiek guztiak bertan behera gera daitezela, bai berriki aurkeztutakoak, eta baita izapidetzea aurreratuago dutenak ere.
- Enpresa handiek sustatzen duten lurraldearen harrapaketa gera dadila, eta Administrazioak ezinbestekoa den lurraldearen plangintza eta antolamendua egin dezala, ez guk eta ezta etorkizuneko belaunaldiek ere ez dezagun gure lurraldea eguzki-plaka, errota eoliko eta hormigoi itsaso bihurtuta ikusi.
- Eusko Jaurlaritzak eta Arabako Foru Aldundiak gure lurraldearekin espekulatzeari utz diezaiotela, eta haren defentsan apustu garbia egin dezatela; Araban bizitzen jarraitu nahi dugu.
- Ezkutatze praktikak bertan behera utz ditzatela eta informazioa garbi helaraz diezaiotela gizarte osoari.
Salatu nahi dugu makroproiektu horiek inpaktu ekosozial izugarria dutela, eta oso kezkagarriak direla biodibertsitatea, laborantza lurrak, basoak eta larreak galtzearen ondorioak. Landa bizitzaren aldeko apustua egin duten pertsonak lurraldetik aterarazten ari dira eta landa-garapen iraunkorreko proiektuak suntsitzen; azken batean, pertsona horiek beren etxeak, herriak eta lurrak uztera behartzen ari dira.
Gizarteari beharrezkotzat saldu nahi zaizkion espekulazio-negozio horiek zuzenean beraien eragina pairatzen duten komunitateekiko inolako gardentasunik, informaziorik eta errespeturik gabe planteatzen ari dira.
Eusko Jaurlaritza eta Arabako Foru Aldundia: garaiz zaudete jarrera aldatzeko, bestela, Arabako espoliazioaren erantzule zuzenak izango zarete eta.
Eredu iraunkorren aldeko apustua egiten dugu, berriztagarriekin ekoitziz autokontsumorako –zero kilometroa–; ez hemen eredu makroetan ekoizten duten eta gero Europari salduko dioten enpresen negoziorako.
Argi utzi nahi dugu kudeaketa politiko oker baten ondorioz gure herrietatik eta lurretatik kanporatuak izateko arriskuan jartzen bagaituzue beti aurrean izango gaituzuela.
Makroproiekturik ez! Lurra defenda dezagun!
----------
Judith Arriolabengoa Unzueta
Aramaixo Bizirik plataformaren izenean
Aramaio
