Eskaera garbi batekin goaz: euskaraz aritzeko gai diren hautagaiekin osa ditzatela zerrendak, edo, gutxienez, Udalaren funtzionamendua eta herritarrekiko harremanak euskaraz izatea bermatzeko ulermen maila nahikoa daukatenekin. Horri lotuta, beste eskaera bat ere egingo diegu: Udalean euskaraz jarduteko borondatez aurkez daitezela, amaitzear den agintaldian kezkaz ikusi baitugu udalbatzaren bilkuretan, euskaraz aritzeko gai izanda ere, gazteleraren aldeko apustua egin duela PSEko bozeramaileak. Arrasateko Udalak aspaldi erabaki zuen euskara izango zela erakundearen zerbitzu eta lan hizkuntza, eta jarrera horiek atzerapauso larria dira, baita herriaren berreuskalduntzean ere.
Bide batez, AED eta Ekin Emakumeak elkarteek erabiltzen dugun lokalaren egoera prekarioaren berri ere ematen ari gara alderdi politikoei. Lokalaren jabetza partekatua da –zati bat AEDrena eta bestea Udalarena–, ez ditu egungo legediak eskatzen dituen baldintzak betetzen eta, ondorioz, inbertsio ekonomiko handia eskatzen du –50.000 euro ingurukoa, BEZ gabe–, irabazi asmorik gabeko elkarte batek bere gain hartu ezin duena.
Lokal horiek, AEDren eta Ekinen bulego lanak, bilerak eta askotariko jarduerak egiteko ez ezik, Udalaren harrera-zerbitzua emateko zein euskalgintzaren eta beste hainbat eragileren bilerak egiteko ere erabiltzen dira.
Aspalditik datorren afera da, eta arazoari behin betiko irtenbidea emateko borondate politikoa ikustea espero dugu bileretan, euskararen aldeko lanak goxotasuna merezi baitu, espazio duinak eta erakargarriak.
----------
Eñaut Muxika Olasagasti
AED elkartearen Zuzendaritza batzordearen izenean
Arrasate
