Kaixo, Joxemari. Pasa zen asteko GOIENAn irekitako elkarrizketari zenbait argiketa egitea egokia iruditu zait. Batetik, zenioen testuan aipatzen nituela abstrakzioan geratzen ziren hari-muturrak. Halaxe da, bi arrazoigatik: bat, iritzi artikulua idazteko eskaerari erantzunez, D2030en balio nagusien inguruko mezu iradokitzailea izan nahi baitzuen testuak, ez aditu begiradatik idatzia; bi, D2030 ekimena bultzatzen dugunon posizioa ez delako erronka gai anitzen gaineko adituena. Kolaborazio espazioak sustatzea da gure lana, askotariko eragile eta herritarrek, esperientzia eta ezagutza arlo anitzetatik, erronkak ulertu eta haietan eragiteko proposamen adostua eraikitzeko aukera diseinatu eta garatzea. Eraldaketa sustatzeko modu berrien bila dihardugu, esparru espezializatuetatik sortutako diagnostiko eta proposamen teknikoki perfektuen logikek erronka konplexuetan sakonean eragiteko mugak dituztela uste dugu. Ez gara hortik ariko, prozesu komunitarioan bilatuko dugu elkarrekin; bestek beste, arrakala sozialen interpretazioa, ikerketa, esperientzia, balio, emozio eta bestelako elementuak uztartuz.
Gutunaren bigarren zatian, faltan sumatu duzu euskal hiztunen bazterketa konpontzeko proposamenen bat. Beharbada, orain arte ez dugu ikusarazi, baina, batetik, D2030 taldean, eskualdeko euskalgintzan diharduten eragileak badira: Goiena, Emun eta Txatxilipurdi; eta, zeharka, ekimenaren proposamena eragiten ari da euskararen normalizazioaren dinamiketan ere. D2030ek, bestalde, euskararekiko konpromiso irmoa dauka, eta, bere ekinbidearen barruan, euskararen presentzia eta trataera lehenesten dugu %100ean. Gainera, ondo begiratzen baduzu, bada 14 prototipoen artean tokiko komunikabideen zentzua berrasmatzea helburu duen bat ere, Goienak sustatua, eta hortik, euskaratik eta euskararako proposamen berriak irtengo dira, ziur. Agian, ikuspegia ere aldatzeko ordua da, eta galdera berriak izan daitezke euskaldunon eskubideak berma daitezen sormen berriaren sua pizteko behar dugun egurra.
Eskerrik asko zure ekarpenengatik, Joxemari. Kafe baten bueltan segi dezakegu berbetan.
