Elkar izan liteke euskarazko izenordain emankorrenetako bat. Elkar du izena euskal argitaletxe eta liburu-denda kate handienak.
Alkar Lankidetza Gunea dugu Bergaran, herriko eta Debagoieneko ekintzaileei lanerako espazio partekatua eskaintzen diena.
Alkartu nai izan zen haren aurretik 70eko hamarkadan, Bergaran garrantzi berezia izan zuen elkartea. Hari esker lortu ziren bere garaian herrian anbulantzia, Aransgi gorren eskola, Gureak tailerrak, Aspace, alargunen elkartea, zaharren egoitza eta beste hainbat zerbitzu. Haren bultzadaz berritu zen herriko udal korporazioa, gero Alkateen Mugimenduan protagonismo berezia izango zuena.
Arrasaten, 70eko hamarkadan, Alkartu elkarte gastronomikoa sortu zuten, frankismo osteko lehena.
Oñatin Elkar Hezi ikastetxea dute 80ko hamarkadaren amaieraz geroztik eta Elkarzabal integraziorako elkartea orain dela 10 urtetik, pertsonen prestakuntza eta laneratzea sustatzen duena.
Aretxabaletan Elkargest aplikazio informatikoa sortu zuten mende honen hasiera inguruan, gaur egun ehunka elkarte gastronomikok beren kudeaketarako erabiltzen dutena.
Abel Muniategiren hitzekin Benitok kantatzen duen kanta batek honela dio: Zenbat gera?, lau, bat, hiru, bost, zazpi. / Zer egin degu?, ezerrez, / zer egiten dugu?, alkar jo, / zer egingo degu?, alkar hil?. Munduak duen itxurarekin, kezkatzeko arrazoiak badaude.
Guk bizitzaren alde egin nahi dugu, elkarrengana bilduz, elkar ezagutuz, elkarri entzunez, elkar lagunduz, elkar elikatuz, elkarri eraginez…
Hemen da Euskaraldia. Elkar mugituz egingo dugu dakar lelotzat. Euskararen aldeko sare zabal bat eraikitzeko aukera aparta. Zu ere animatzen zara?
