Orduan ere orrialde hauetan idaztea egokitu zitzaidan eta hau idatzi nuen: "Gauza asko aldatu dizkigu bat-batean koronabirusak eta aldaketa horietako asko betiko geratuko dira. Aldaketak ekarriko ditu harremantze-moduetan, lan-sistemetan, irakaskuntza-metodoetan... Baina gu geu zertan aldatuko gaitu? Nolakoak izango gara honen ondoren? Solidarioagoak, enpatikoagoak ala lehendik garena baino geurekoiagoak?".
Hedatu da, bai, telelana, ugaritu telebilerak, orokortu telekontsultak. Aldatu da mundua bi urteotan, baina ez, hain zuzen ere, gizarte justu eta orekatuagoa eraikitzeko norabidean. Pandemiak lehengo arrakalak handitzea baino ez du ekarri.
Oxfam Intermon gobernuz kanpoko erakundeak Berdintasun ezak hil egiten gaitu leloa daraman ikerketa argitaratu berri du, eta bertan salatu du munduko hamar gizon aberatsenen ondasuna bikoiztu egin dela azken bi urteetan, eta, bitartean, munduko biztanleen %99ren diru-sarrerak gutxitu egin direla.
Aldi berean, pandemiak gizarte nahaspila, mesfidantza, beldurra eta noraeza ekarri ditu, eta bistan da batzuei ondo etorri zaiela. Gotzon Garateren atsotitzen liburuan dator honako hau: Zikina, ustela eta kaka, kakalardoen mauka. Zalantzarik barik, kasu honetan, kakalardoen mauka horren ordez jar genezake betikoen mauka.