Euskaraz hamaika hamar gehi bat baino gehiago da. Oso sarri egindako ekintzak adierazteko erabiltzen dugu ("Hamaika bider esan diot, baina alperrik!") edo zerbait handia, harrigarria… adierazteko ("Hamaika ikusteko jaio gara!"). Hamaika gairi buruz ezin idatzi, eta bi aukeratu ditut:
Bat. Igandean, hamaika injustizia, egoera latz, bizi behar izan eta izaten dituzten 37 errefuxiaturi ongietorria egin genien Oñatin. Hamaika bidegabekeria konpontzeko ez du balioko ekintza bakar horrek, baina zertxobait arintzeko balio badu, gaitz erdi! Hunkigarria harreran esker ona adierazteko Txoriak txori abesten entzutea errefuxiatuak. Errefuxiatuak eta herritarrak bat hartuta. Horrelakoak ikusita, zalantzan jartzekoa da harrera zeinek zeini egiten dion.
Bi. Euskaraldiak hamaikarekin jolasteko proposatzen digu: hamaika egunetan, gure egunerokoan, tarte handiagoa eskaintzea euskarari. Batzuk, belarria jarrita, eta beste batzuk, ahoa zabalduta. Baina denok eroso, lasai eta natural. Prest eta bizi. Azaroaren 23tik abenduaren 3rako hamar gehi bat egunak izan daitezela hamaika!
