Milaka herri daude munduan buru-belarri turismora murgilduta bizi direnak. Eta agintarien aldetik hasita herritarren lanbide bakarra turismoa izanik, beren zerbitzu hoberenak helburu horretara bideratuta dituztenak. Baina denok dakigu ez dela hori Oñatiren kasua. Alderantziz, herri turistiko ordez, herri industriala dela esan beharko genuke. Izan ere, biztanleak eta dituen enpresak kontuan hartuz, herri industrialen artean sartu daiteke, zalantzarik gabe.
Baina, beste aldetik, ez da zentzugabekeria ere horrelako albistea komunikabideetan agertzea, Oñatik dauzkan baliabide naturalak eta bere historia bereziari lotuta dituen monumentu oroigarriak kontuan hartzen badira. Erdigune paregabeari hedadura zabalean dauzkan toki zoragarriak gehituta, herri turistiko izateko baldintza guztiak dauzka.
Baina, herri turistikoa izan edo ez izan, astindu estetiko batek asko hobetuko lituzke dauzkan edertasunak.
