Baina bere zentzu hoberenean erabilita, gai mota eta ingurunea kontuan hartuz gero, ez da eragozpenik izaten edozein harrotasun onartzeko. Badu bere parte oso positiboa. Gaitasun, ezaugarri horri esker, pertsonok, herritarrok ahalegintzen gara geure bizitza, geure herriak hobetzen.
Sentimendu horrek, besteak beste, laguntzen du gizartearen aurrerabidean. Baina, zoritxarrez, harrotasun hori ezin dugu ageri gai guztietan. Eta horietako bat, oso garrantzitsua, euskararen erabilera da. Herri gutxi izango dira euskararen erabileraz harro sentituko direnak. Denok ezagutzen ditugu dauden zailtasunak, oztopoak. Baina geure eskuetan dauden bideak ez ditugu erabiltzen. Bere neurriko herrien artean, Oñati izan daiteke salbuespena. Nahiz eta kanpotarrak ugaritzen ari diren, euskararen erabilera nahiko ondo mantentzen dela esan daiteke.
