Botere gabekoena umore aspirazionala da. Gauzak aldatzea bilatzen du, eta agintekoen kontraesanak azaleratu. Umore arriskutsua da, zigortua izateko presiopean egina. Bere horretan, sekulako indar aldatzailea dauka.
Goitik beherako umoreak araua azpimarratzea du helburu. Lotsarazi berritzailea dena. Gaixotasun mentala eta soziala erabiltzen ditu menpekoa menpe mantentzeko.
AEBetako lehendakariaren azken barrabaskeria ikusita –umoretik batere ez daukana–, pentsatu dut antzerako patroiak agertzen direla harro egon/sentitzearekin.
Harrokeriak badu inposatu gura bat, besteak zure esanetara ekartzea eta horretarako behar eta behar ez diren neurriak inposatzea. Etsaia txikitu arteraino. Venezuelakoak, baina baita Gaza, Nigeria ala Irangoak, oso adibide onak dira.
Kontrara, harrotasunak batzearen alde egiten du. Txikitu dutena osatzeko. Etorkizun hoberako bidea zabaldu.
Umorea aliatu ona izaten du.