Joan den ostegunean, hilak 5, onartuta gelditu ziren, EAJ-PNVren aldeko botoekin, 2018rako ordenantza fiskalak Oñatiko udaleko Osoko Bilkuran. Horren harira, jeltzaleak pozik agertu dira behar gehien duten pertsonei zuzenduta aurkeztu dituzten proposamenak aurrera ateratzea lortu dutelako.
Horiek horrela, iazko gizarte-ikuspegiari jarraiki, 2018ko ordenantza fiskaletan ere gizarte-ongizate arloan eraginkorrak eta garrantzitsuak diren hobari gehiago txertatzea lortu du EAJ-PNVren udal-taldeak. 2017an ludotekako eta Gaztelekuko ikastaroetan, eta Jabetza eskolako tasetan lortu zituen hobariak; datorren urteari begira, hobari horiek kiroldegiko, euskaltegiko eta kultur etxeko tasetan ere aplikatzea lortu du. Hobari horiek eragin zuzena izango dute herritarrengan, bereziki, behar gehien duten oñatiarrengan: DSBren onuradunengan, kide ugariko zein guraso bakarreko familiengan eta genero-indarkeriaren biktimengan, esate baterako.
Zergei dagokienez, EAJ-PNVk udal-gobernuaren konpromisoa lortu du OHGZ eta EIOZen inguruko hobari eta salbuespenak ordezteko ordenantzak berehala erregulatzeko; hala, onuradunek urtarrilaren 1etik aurrera jaso ahal izango dituzte aipatu hobariak. Izan ere, araudi-aldaketa egonda, aipatutako bi zergen gaineko hobariak ordenantza fiskalen dokumentutik desagertzen dira, eta, ondorioz, horien onuradun diren herritarrak (DSBren onuradunak, guraso bakarreko familiak, genero-indarkeriaren biktimak, nekazaritza-sektorea…) onurarik gabe geldituko dira. EAJ-PNVren proposamenari esker, onuradunek orain arte bezala jaso ahal izango dute hobaria.
Zabor bilketa tasa
2014az geroztik, EAJ-PNV kezkatuta dago zabor-bilketak eragiten duen defizita dela eta. Jeltzaleen iritziz, ez da Udal Elkarteak gomendatzen duen gastu-mailarekin bat datorren udal tasa aplikatzen. “Etxebizitza bakoitzak urteko 131,13€ ordaintzen ditu zabor-bilketagatik, eta horrek, bizileku eta urteko, 20€-ko defizita sortzen dio Udalari”, azaldu dute jeltzaleek. Ildo horretan, datorren urteari begira zabor-bilketa tasa 2€ igotzea proposatu du EAJ-PNVk (%2.6). Modu horretan, pixkanaka, zerbitzuaren defizitari aurre egiten zaio, eta, etorkizunera begira, saihestuko egingo da 2017an ezarri zen bat-bateko igoera. “EAJ-PNVk etorkizunera begira egin du tasaren igoera-proposamena: “Gaur egun EH Bilduren gobernuak aplikatzen duen diru-bilketa baina bide zuzenagoa eta orekatuagoa dela uste baitugu”, gehitu du udal- taldeak.
