Mito bat joan da

Erabiltzailearen aurpegia Beñardo Kortabarria 2020ko aza. 27a, 00:00

Ez, ez naiz Maradonaz ari, Mañuaz baizik. Mañua Salvador Peña zen, urte askoan Antzuolako Mairuaren Alardean mairuaren zeregina antzeztu zuen pertsona. Makina bat aldiz ikusi nuen asto gainean desfilatzen eskuekin jendea agurtuz, beltz-beltz margotuta, gudari-ilara geratu eta xanpaina edaten. Ongietorri ostean, Alardeko buruzagiak egindako galdera/aginduei buruarekin baietz eta ezetz erantzuten –baiezkoa tokatzen zenean ezezkoa erantzunez tarteka–, turbantea zapaltzera behartuta izan ondoren, preso zeukaten kateei tira eginez… Kotxe bateko maletategian sartu eta bahitu ere egin zuten urte batean, eta mozkor-mozkor eginda askatu zuten. Gure haurtzaroko jaietako pertsonaia nagusia zen, mairua, guretako mitoa.

Seguruen antzuolar gehienok mairu moduan gogoratuko dugun arren, Salvador, batez ere, mañua zen, dimentsio publikoa zuen pertsona soil eta on bat. Adimenez ez zen munduko argiena izango, baina argitasunez bizi izan zen, eta umorez. Kanpotik etorri, bertako emakume batekin ezkondu eta familia osatu zuen. Eta familia aurrera ateratzeko, lan egin zuen, beltz. Bergarako Altos Hornos-en egin zuen lan, antzuolar askok bezala. Langile amorratua zen mañua, estimatua lankideen artean. Ez dut oso ondo gogoratzen pasadizoa, baina badakit egun batean 25 ordu lan egin zituela jarraian, ordua aldatzen zen horietako batean: 16 + 1 lantokian, eta beste 8 auzolanean.

Jubilatu eta gero ere, behin baino gehiagotan ikusi nuen aldamio gainean, bidegintzan ere bai, Ugarte Torre baserrian orduak eta orduak sartzen… Azken urteotan, adinean aurrera joanda, jaitsita zegoen, baina ez geldirik: Lizarraga auzoko horma-zuloetako barraskiloen harrapatzaile emankorrena zen. Lizarraga inguratuz gero, han ikusiko zenuen mañua, plastikozko poltsatxoa barraskilo mukitsuz beteta.

Astean urte bat bete da emaztea hil zitzaionetik, tartean ere beraiekin bizi zen alaba hil zen, eta orain bera. Mitoa izanda, ez da bakarrik egongo.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak