Eskoriatzako 24. Ferixie

Erabiltzailearen aurpegia

Duela 24 urte, Arizmendiko Jose Aranak antolatuta, Eskoriatzako lehen Ferixie ospatu zen. Aurten, lehen aldiz, Eskoriatzako kaleak ez dira jendez bete. Artisautza eta gure baserrietako produktuak eskaintzen dituen posturik ez da izan. Ezin izan ditugu trikitixak, txalaparta eta bertsoak entzun. Covid-19a izan da guzti honen erruduna, baina ezin izan du eskoitzarren ilusioarekin eta dibertitzeko gogoarekin.

Ez da gauza bera izan, egia da. Antolatzaileek jakin zutenean aurten ezin izango zela Ferixie ohiko moduan ospatu, plan alternatibo bat lantzen hasi ziren. Horrela, Jose Aranako profesional eta guraso talde bat sortu zuten. Proposamen batzuk jarri ziren mahai gainean. Hasteko, garrantzitsua zen Ferixa egunean irudi bat izatea. Horrela proposatu zioten Karmelo Oñati eskoitzarrari Ferixie irudikatzeko marrazki batzuk egitea, eta gainera, Eskoriatzako haurrek festan parte har zezaten, koloreztatzeko aukera izatea.

Bigarren ekintza Eskoriatzako Ferixie etxetik ospatzera gonbidatzeko bideo bat grabatzea izan zen. Bideo horretan Jose Aranako profesionalek eta familiek parte hartu zuten. Kolaborazio gehiago izan ziren. Oihana eta Haizea Aranak bertso batzuk abestu zituzten giroa berotzeko. Bideoa egiten Imanol Belokik parte hartu zuen, bere esperientzia eta sormena aprobetxatuz ikus-entzunezkoak egiten.

Erronka martxan zegoen. Jendeak Eskoriatzako Azokaz etxetik gozatzea besterik ez zen geratzen: baserritarrez janztea, txorimaloa egitea, taloa prestatzea eta ospakizuneko argazkiak edo bideoak bidaltzea.

Eta horrela izan zen. Larunbatean, Eskoriatzako Azokaren egunean, txistulariak kalera atera ziren. Festaren soinua zen, Ferixaren soinua. Jose Aranakoen gonbidapenari emandako erantzuna eta parte hartzea ikaragarria izan zen. Argazki eta grabazio pila bat jaso dituzte, eskoitzarrek herriko agendan egun garrantzitsu honi dioten maitasuna islatuz.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.