Aurkikuntzaren berritasuna izan zen muntaiak zuen garrantziaz ohartzea: irudi berberak erabilita, orden desberdinetan jarri zituen Kulechovek, eta mezuaren esanahia nola aldatzen zen ohartu zen.
Urtarrilaren 10eko ETBko albistegiak ikusten ari nintzela ohartu nintzen Kulechov efektuaren interesaz. 23 minutu bete zituen su-etenaren gaiak egun hartan. Informazioaren objektibotasuna baloratu barik, ETBk su-etenaren gainean transmititu gura izan zuen mezua antzeman nuen argi eta garbi, soilik albisteen hurrenkerari erreparatuta.
Patxi Lopezen adierazpenen ondoren etorri ziren Rubalcabarenak, eta politikari ugariren desfilea amaitu zen ezker abertzalekoen hitzekin. Horren ostean azaldu zituzten honakoak: ezker abertzalearen ilegalizazio eta izen aldaketak, ETAk aitortutako eta hautsitako su-etenak eta, amaitzeko, terrorismoaren biktimen elkargoaren idatzia ETB1en eta elkargoko Pueyesen elkarrizketa ETB2n. Kulechov efektu perfektua.