Iturri gisa 1974ko Espainiako biztanleriaren errolda hartuta, badakigu duela berrogeita hamar urte 73.497 saharar zeudela; horietatik 40.000 1975ean hil ziren, Marokoko goi-agintari militarrek eta zibilek sustatutako genozidioan, 2015eko Espainiako Auzitegi Nazionalaren zigorrak jasotzen duenaren arabera.
Kristina Berasainek, BERRIA egunkariko nazioarteko arduradunak oso ondo ezagutzen du saharar herriaren errealitatea. Berak badaki Mendebaldeko Saharakoa dela ahaztutako eta isilarazitako gatazka luzea. Sahararren errealitatea harresi luze batek bitan zatitzen du; alde batean errepresioan bizi diren pertsonak, bestean basamortuen basamortuan, iheslariak.
Bihar, otsailaren 20an arratsaldeko 19:00etan Kulturaten, Kristinak berak kontatuko digu urte askotako kazetaritza-kronikaren lanaren emaitza, Sahara herri bat erresistentzian liburuan bildu duena. Berasainena oso argitalpen garrantzitsua da, saharar herriaren errepresioari buruz euskaraz idatzitako lehena, eta ARGIA 2024 saria jaso du prentsa kategorian.
Duda barik, bihar asko ikasiko dugu Kristina Berasainen eskutik!
