Prabha, helduena, familiak behartuta, ia ezagutzen ez duen gizon batekin ezkonduta dago aspaldi. Senarra Alemaniara joan zen eta ia ez du hari buruzko berririk izan. Adu, gazteena, musulman batekin maiteminduta dago eta euren harremana ezkutuan mantendu beharko dute. Aduk gizarteak eta ohiturak ezarritako bidetik irten nahi du. Mumbai jendez beterik dagoen hiri zalapartatsua izan arren, garbi antzeman dezakegu nola, nahiz gizakiz inguraturik bizi, pertsonak bakarrik eta babesik gabe senti daitezkeen. Filmaren lehen zatia Indiako Mumbai hirian gertatzen da eta bigarren zatia, kostako herri batean.
Zuzendariak iraupen gutxiko eszenak erabiltzen ditu, pintzelkadak izango balira bezala, pertsonaien eta bizi diren gizartearen erretratua egiteko. Modu horretan, euren eguneroko bizitza nolakoa den erakutsiko digu. Filma aurrera doan neurrian, pertsonaien arteko elkarrizketei ere tokia egingo die Kapadiak. Horrela, gauzak gehiegi azpimarratu gabe eta diskurtsoan erori gabe, pertsonaien eta euren artean sortzen diren lokarrien erretratu fina eta egokia lortzen du.
