Sparta filma polemikaz inguratuta heldu da Donostiara. Torontoko Zinemaldiak baztertu egin zuen filma, zurrumurruak sortu zirelako filmazioan parte hartzen zuten haurren tratu desegokiari buruz.
Filmaren gaia pedofilia da. Emaztegaia duen gizon bati haurrengana hurbiltzea gustatzen zaio. Helduekin harremanak izateko arazoak ditu eta haurrekin hobeto konpontzen da. Haurrak behatzea eta posible denean eurekin kulunketan jolastea eta elur bolak botatzea gustatzen zaio. Gizonaren nortasuna nahiko infantila da. Ematen du haurtzaroan gelditu dela eta haurtzaroko aztarnak ez direla desagertu. Baina aldi berean, haurrekin jolasterakoan sentitzen duen eszitazioak bere burua atsekabetzen du.
Seidl zuzendariak, filmaren izenari dagokionez, espartako metodoa jarraitzen du. Hau da, ez da sentsazionalismoan erortzen. Filmatzeko modu soila du. Ez ditu gauzak azpimarratzen. Kontatzen duena nahiko latza eta desatsegina da gehiegikerietan erortzeko. Pertsonaiaren bakardadea, ezintasuna eta perbertsioa ikusten dugu. Horrekin batera, filmean agertzen dira haurren gurasoak ez dira gehiegi arduratzen seme-alabez, eta askotan, indarkeria erabiltzen dute horiekin. Era berean, pedofiloaren aita nazien jarraitzailea zen. Horrela bi alderdiak lotuz; haurtzaroan jasandakoak zerikusia izan dezakeela heldutasunera iristean duen portaeran pentsa dezakegu. Baina hori guztia ez da gehiegi lotzen, eta ez da oso argi geratzen filmaren interpretazio zehatza egiteko.
