Aramaion ekografiak euskaraz

Erabiltzailearen aurpegia

Lehen aldiz Debagoieneko ospitalea ekografien txostenak elebitan bidaltzen hasi da Aramaiora. Bazen garaia! Gaur egun, zoritxarrez, Osakidetzak ez du osasun arreta euskaraz bermatzen, ezta eskaintzen ere. Eta honek ondorio latzak dakartza.

Alde batetik, erabiltzaileen hizkuntza eskubideak urratzen ditu, euren arteko hierarkiak ezarriz. Bestetik, ez du Euskadiko legedia betetzen, ezta goi mailakoa den Europako legedia ere. Azkenik, zerbitzuaren kalitateari kalte egiten dio. Izan ere, kalitatezko osasun laguntza pazientearen hizkuntzan eskaintzen dena da. Euskarazko osasun zerbitzurik ez badago, ez da kalitatezkoa. Osasun arreta euskaraz lortu behar genuke, baina bere osotasunean, hau da, ahozko eta idatzizko harremanetan. Alegia, osasun langileokin euskaraz hitz egiteaz gain, ohar eta txosten guztiak euskaraz jasotzea. Funtsean, historia klinikoa euskaraz. Hau guztia lortzeko, irudi proben txostenak, besteak beste, ezinbestekoak dira. 

Zergatik, hortaz, ekografiak euskaraz? Eskanerrak edo erresonantziak espezialistek eskatzen dituzte, baina familiako medikuok ekografiak eskatzen ditugu batez ere. Horregatik ekografiekin hasi gara.

Ondo eginak ondo dirudi, baina horrelako ekimen bat ez da aurrerapausoa izango, Aramaiora mugatzen bada. Debagoieneko erabiltzaile guztiek euren ekografien txostenak euskaraz jasotzeko eskubide osoa dute; egia esan, irudi proba guztien txostenak. Ia eskatzera animatzen zareten!

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.