Ez da pandemia, sindemia da

Erabiltzailearen aurpegia Amagoia Lasagabaster 2021ko urt. 15a, 00:00

Urte berri, zaharrak berri. Ondo borobiltzen du esaldi horrek egungo panorama tristea. Gure agintariek koronabirusa bukatu baino gehiago izurritearekin elkarbizitzea erabaki zuten momentutik bagenekien hau luzerako joango zela, eta halaxe doa. Txertoak ematen du ilusio apur bat, baina ikusi egin behar noiz, zenbat, norentzako, ze efikazia...

Irakurri dut nonbait hau ez dela pandemia, sindemia baizik. Hau da, krisi ezberdinen sinergia dela. Hezkuntzak, elikadurak, lanak, etxebizitzak eta horrelako eragileek eta faktoreek bat egiten dutela. Beharbada, gure agintariek hori guztia kontuan hartuko balute, hobeto asmatuko genuke krisiaren irteeran. Adibidez, langile prekarioak ez du langabezian gelditu nahi eta horregatik ez du bere lana utziko, kutsatuta egonik ere. Bestalde, beste erremediorik gabe beste zazpi lagunekin etxe berean bizi den emakume etorkinak arrisku gehiago izango du kutsatzeko. Norbaitek esan zuen birus honek guztiok berdintzen gintuela; bada, ez dut uste horrela denik, ezta gutxiago ere. Agerian gelditu dira, beste behin, gizarte bereko klase sozialen eta ekonomikoen arteko desberdintasunak.

Kontuan hartzeko beste faktore bat da ingurumena eta gizaki-termitok egiten dugun naturaren ustiaketa basatia. Horrek ere zerikusi zuzena izan du sindemia honetan. Hegaztien eta txerrien gripeak, behi zoroak... ahaztuta izango ditugu gehienok, baina horiek eman ziguten lehenengo abisua… eta, zer esanik ez, berotegi efektuaren ondorioez… Oraindik asko daukagula ikusteko iruditzen zait. Ez naiz zientzialaria, baina argi daukat, gauden puntuan, agintariei baino fede handiagoa diedala horiei. Gehiago entzun eta gehiagotan kasu egin beharko genieke.

Aspaldi idatzi barik neukan zutabe hau, eta ez nuke lehenengoa mezua katastrofista eta tristea izaterik nahi. Plan handiak ditut 2021erako: lehena, optimismoa galdu barik zoriontsu izatea! Ahalegindu gaitezen denok.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak