Kartzelan dauden zazpi gazteetako hiruk 900 egun baino gehiago daramatzate barruan. Beste laurek, berriz, 401 egun. Eta, bitartean, hemen gaude. Urtebete pasatu da eta egunetik egunera mingarriagoa zaigu egoera hau, gure seme-alabak errugabeak direlako kondenatuak izan diren inputazioengatik.
Hasieran, guztia zen terrorismoa. Bi urte eta erdi geroago, bi sententziak baztertu dute terrorismo delitua. Hala eta guztiz ere, Auzitegi Nazionaleko sententziek jipoi basati bateko erasotzaileak direla diote, baina eraso bortitz horren arrastorik ez dago mediku partean jasotako lesioetan, ez eta epaiketan 56 testiguk eta 11 perituk emandako azalpenetan. Eta, ez hori bakarrik, diskriminazio ideologikoaren astungarria aplikatu diete. Diskriminazioa: nork nori?
Zer dela eta tematu dira hainbeste? Zer dela eta horrenbeste fake news? Zeinek ateratzen du etekina? Errugabeak kartzelaratuz zertan hobetu du gure gizarteak?
Gure seme-alabak ez dira heroiak, martiriak izatea ere ez dugu nahi, baina, dagoeneko, biktimak dira. Badakigu injustizia asko dagoela, ez gara bakarrak. Gure gizarteak asko hobetu beharra dauka, eta kasu zehatz honetan, gure mutilak aspaldi egon beharko lirateke etxean.
Guztia bukatzean: lehen baino hobea eta ederragoa izango da. Ortzadarrarekin itzuliko zarete
-----
Ana Larraza Erdocia eta Amaia Amilibia Salgado
Altsasu Gurasoak: 'Altsasu auziko' gazteen gurasoak
Altsasu