Egoera honek eragin zuzena dauka norbanakoaren ongizate psikologikoan eta honek, ondorioz, dakar bikote, famili eta gizartearen ondoeza. Garbi dago lanean jarduteak ez duela kontrakoa bermatzen beti; baldintza prekarioetan lan egiteak ez dakar-eta independentzia ekonomikoa eta autonomia, eta ezta ongizate psikologikoa ere.
Fagor Etxetresnak kooperatiba itxi zela urtea bete denean, albiste lazgarriak izan ditugu berriz ere bailaran, eta familia askoren egoera modu erradikalean aldatu da egun batetik bestera. Bergaran, jakin berri dugu Candy-Hoover itxiko dutela. Hipoteka, seme-alabak eta hainbat zor bizkarrean izanik, zaila da lanik ezak eragiten duen larritasuna gainditzea, eta erraza egoerak gaina hartu eta norbera zulora erortzea. Tamalez, egoera oso gogorrean geratzen ari dira hainbat eta hainbat herritar gure herrian, eta hori gutxi balitz, elkarrekiko elkartasuna erasanda dago. Arazo batek bestea ekarri du, ez dakit zein den larriagoa.
