Bailarako kooperatibak erreferentzia dira askorentzat mundu osoan. Mundu osoan? Ez, jarrera kritikoenak bailaran bertan dituztela esango nuke. Kontinente guztietako lagunak etortzen dira kooperatibak nola dabiltzan ezagutzera. Jakin nahi dute zergatik, nola, zein hobetzeko dituzten, etab. Bisitarekin, haietako askok beraien lurraldea hobetu nahi dute. Izan ere, sistema inperfektua izan arren, aspalditik funtzionatzen du eta gizartean ondorio positiboak ditu. Baina, gurean, gizarte justuagoa aldarrikatzen duten mugimenduentzat kooperatibismo erreala ez da erreferentzia.
Duela hilabete, Noam Chomsky elkarrizketatu zuten El paísegunkarian. Galderetako batean, harira etorri gabe, honela erantzun zuen: "Begira Mondragon Kooperatibari, hor egon da 1950eko hamarkadatik, langileen jabetzako multzoa da eta, hein handi batean, haiek kudeatzen dute. Akatsak topa diezazkiokezu, baina, neurri handi batean, munduan oso ohikoa ez den puntu bateraino, arrakastatsua da".
Noam-ek izango ditu beste eredu batzuk ere, baina, arazoak arazo, planeta honetan bere erreferentzia nagusia hemengo kooperatibak dira.
