Lur berezia

Erabiltzailearen aurpegia

Hemengo kooperatibek eta elkarte gastronomikoek antzekotasun aipagarriak dituzte, funtzio ezberdinak betetzen dituzten arren. Autogestionatuak dira biak: bazkideek hartzen dituzte erabakiak eta kudeatzen dituzte erakundeak. Elkarte gastronomikoek Batzar Nagusia eta Zuzendaritza Batzordea izan ohi dute; kooperatibetan, konplexuagoak direnez, horiez gain, organo gehiago daude. Organizazio batean zein bestean, bazkide bakoitzak boto bat dauka.

Bietan dirua jarri behar da bazkide sartzerakoan –guztiek zenbateko bera– eta jabetza ulertzeko modu bera daukate. Kooperatibak merkatuan X milioi balio badu ere, bazkideak erretiroa hartzen duenean ez du jasoko zati proportzional bat, baizik eta hasieran ipinitakoaz lotura duen diru kantitatea. Elkarte gastronomikoetan ere horrela da. Bestalde, ni kide naizen elkartearen kasuan, adibidez, borondatez uzten duenari zero euro dagokio.

Bi erakundeak, gainera, garai berean sortu edo agertu ziren hemen –hemeretzigarren mende amaieran– eta ez ei dute parekorik mundu mailan. Eusko lur honek izango du zerbait berezia landare mota bi hauek hain indartsu hazteko.

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.