Herritar batzuk eskatuta, dantza-jauziak hastapeneko ikastaroa antolatu du Eskoriatzako Udalak. Helburua izango da Euskal Herriko plazetan hain zabalduta dagoen dantza-molde hau dantzatzeko oinarrizko ikaspenak hartzea. Ikastaroa larunbat arratsaldeetan izango da, urriaren 31-n hasita, abendua bitartean. Irakaslea: Patxi Montero. Izena ematea Kultur Etxean egin behar da urriaren 29a baino lehen.
Hemen datuak:
HASIERA: urriak 31
NOIZ: zapatu arratsaldeetan (bi orduko saioak)
IRAUPENA: sei saio, abendura arte.
PREZIOA: 50,00 euro
IZENA EMATEA: Kultur Etxean / 943 71 46 88 (epea: urriak 29)
Hastapeneko ikastaroa izango da. Ez du ematen dantza-jauzien oinarriak osorik ikasteko. Baina hastapena da, eta gero jarraitu nahi bada ikastaroa osatzeko, aztertuko da jarraitzeko aukera.
Zer diren dantza-jauziak:
Dantza-jauziak (mutxikoak ere esaten zaie) dantza sozialak dira, herritarrek gozamenerako dantzan egitekoak. Hainbat urtetik hona oso indarrean daude Euskal Herri osoko plazetan. Muskizetik Tuterara, Gasteiztik Baionara, dantzaldi gehienetako parte dira; zenbaitetan, gero eta presentzia handiagoan.
Bere arrakastaren gako bat izan liteke esfortzu fisiko handirik gabe dantza daitezkeela. Baina abilezia eskatzen dute, eta hor erronkaren xarma... Horrez gain, musika polita, gureak direla...
Ezaugarri horiekin, adineko jende asko eta asko da jauzien zale, ikastaroetan parte hartzen dute, eta gero plazetan dantzan. Halere, adinekoak asko badira ere, gazteen dantza ere bada, eta zale asko ditu. Umeentzako izan ezik, adin guztietarako moduko dantza moldea da.
