Gurel Guraso Elkarteko gurasoek, herriko haurrei baserriko lanak nola egiten ziren irakasteko asmoz, Toki Eder Erretiratuen Elkarteko kideengana joan eta proposamena egin zieten kontaketa bat antolatzeko. Hori horrela, arto-zuritzeaz arituko dira kontu-kontari domeka honetan, gazteen eta adinekoen artean giro ona sortzeko asmoz.
Periko Orobengoa izango da kontu-kontari arituko den pertsonetako bat, adineko beste hainbat gatzagarrekin batera, eta, haren esanetan, gogoz daude haurrei irakasteko. "Gurelekoak etorri ziren, adinekook ipuin batzuk gazteekin egingo genituen galdetzera. Hasiera batean, aspaldiko pasarte batzuk kontatzea pentsatu genuen, baina, zer kontatu antolatzen hasita, arto-zuriketa kontuez soilik aritzea pentsatu genuen".
Teoria eta praktika
Berbaldirako materiala eramango dute, eta, teoriaz gain, praktikaldia ere izango dute bertaratzen diren gaztetxoek. Honela azaldu du Orobengoak: "Arto-lasto batzuk eramango ditugu, artaburu batzuk, lastoekin edo malutekin. Gero, garandu egingo ditugu artoak, bi eratara: kaskararekin, batetik, eta burdin batekin, bestetik. Gainera, irina ateratzen saiatuko gara, eta morokila ere egingo dugu, esnearekin hartzeko; txistorra pixka bat ere egingo dugu".
Transmisioa helburu
Domeka honetako saioaren helburua aspaldiko ohiturak herriko gaztetxoei transmititzea izango da, eta, bide batez, artoak ganaduarengan eta pertsonengan izan duen elikadura garrantziaz jabetzea, antolatzaileen esanetan.
