Auzolanetik asko duen herri afaria izango dute gatzagarrek zapatuan. Andramaixetan bertakoentzat hitzordu kuttuna izaten da; lagunartean eta etxekoekin gustura egoteko unea. Hala ere, gorabeherak ere izan dituzte dena antolatzeko. "Taldeetan banatuta prestatu izan dugu beti herri afaria, baina parrilletan aritzen diren asko nagusiak dira, nekatuta daude, eta modu honetara egin beharrean catering bat kontratatzekotan izan gara. Hala ere, gazteek erreleboa hartu dute, eta oso pozik gaude", dio Juanito Bengoa zinegotziak.
Entsaladak eta parrilla
Entsaladez gain, parrillan prestatutako txerri saiheskiak eta txuletillak egingo dituzte afaltzeko, bakoitzetik 40 kilo inguru. Hala adierazi du parrillan lanean arituko den Iraitz Diaz gatzagarrak: "Ohiturari eusteko, gazteok animatuko gara aurten parrilletan janaria prestatzen, baina azpimarratu behar da lantaldeetan prestatuko dugula herri afaria. Sorginak emakume taldekoek entsaladak prestatuko dituzte, beste batzuek mahaia prestatuko dute, beste batzuek jendea mahaira bideratu eta ordenatu, eta beste batzuk parrillan arituko gara".
Eguraldiak baldintzatuta
Normalean, 140 eta 160 lagun artean batzen dira afaltzeko, eta, pertsona kopurua eguraldiak baldintzatuko duen arren, zenbaki horren bueltan ibiliko direla azpimarratu du Diazek: "Frontoi barruan bizi izan dut herri afaria, baina eguraldi onarekin kanpora ateratzea ere bada asmoa; ikusiko dugu…".
Afalostea girotzeko, Amaia DJa
Herri afaria amaitutakoan, erromeria doinuekin izango da Amaia Txintxurreta oñatiarra afalostea musikaz girotzen, 00:00etatik aurrera; herritarrak dantzara animatuko ditu.
