Eugenio Otsoa oroitzeko bola-txapelketa jokatuko da egubakoitzean, 22:30ean. Iaz jokatu zuten lehenengo edizioa, eta bigarren edizioa antolatu dute aurten, Eugenio Otsoak zuen desioa betetzeko.
"Eugenio Otsoaren eguna uztailaren 14an da, Pobre de mi egunean; aurten, domekan. Baina kontua da Bizkaiko txapelketa ere jokatzen dela egun horretan. Hori horrela, egubakoitzean, ibiliko gara", Juanito Bengoa gatzagarrak azaldu duenez. Gaineratu duenez, Otsoaren egunaren bueltan urtero antolatzen jarraituko dute bola-txapelketa.
21:00etan irekiko dute
Izen-ematea egunean bertan egingo da, eta, horretarako, parte hartu nahi duenak hamar euro ordaindu beharko ditu. "21:00 aldera irekiko dugu bolatokia, eta lehiaketak ordubete eta erdi inguru iraungo du, gutxi gorabehera. Iaz, 80 pertsona inguruk jardun genuen, eta, aurtengo kopurua aurreikustea zaila den arren, 50 lagun batuko gara, seguru".
