"Pandemia hasi zenetik ez dugu koronabirus positibo askorik izan herrian. Gatzagako Udaletik uste dugu gauzak ondo ari garela egiten, eta egin ditugun ekintza kulturaletan edo bestelakoetan herritarrak zintzo aritu dira Osasun Sailaren gomendio guztiak jarraitzen. Bide beretik jarraitu nahiko genuke, eta ea ez ditugun kasu gehiago izaten…", adierazi du Garazi Orobengoa Leintz Gatzagako zinegotziak.
Intzidentzia-tasa: 427,35
Herriko azken kasu positiboa apirilaren 19an atzemanda, 14 egunean –maiatzaren 2ra arte– ez bada kasurik baieztatzen, intzidentzia-tasa hutsera jaitsiko da. Hala ere, gaur-gaurkoz, 427,35ko intzidentzia dute Gatzagan, eta ez erlaxatzeko gomendioa egin dute udal ordezkariek: "Biztanle gutxi dituen herria izanda, kasu gutxirekin igo egiten da intzidentzia-tasa Gatzagan; hala ere, Eusko Jaurlaritzak astelehenean argitaratu zuen udalerrien ebazpenean, ez da eremu gorrien zerrendan ageri Gatzaga. Beraz, ez dira aplikatuko 400etik gorako intzidentzia metatua duten eta eremu gorrian sartuta dauden herriei aplikatzen zaizkien neurriak".