Gatzaga 3500 da Leintz Gatzagako aratusteetara begirako aurtengo gaia. Etorkizuneko Gatzaga islatu nahi dute herritarrek, eta norbanako bakoitzak bere mozorroa edo taldeka egindakoak ikusi ahal izango dira zapatu honetan Leintz Gatzagan.
Labidean ipinitako arbelean gai ezberdinak jartzeko aukera izan dute herritarrek hainbat egunetan, eta boto gehien jaso duena Gatzaga 3500 izan da.
Aratusteak ospatzeko, Soran Etxean bazkaria egingo dute hainbat herritarrek. 14:30ean izango da bazkaria, eta 50 pertsona inguru izango direla aurreikusten da. "Izen-emate asko egon dira, baina ea eguraldiak laguntzen duen eta jendeak ez duen atzera egiten", adierazi du Soran Etxeko Montse Valeriok.
Hotela, jai eremu
Bazkalostean, DJ Humerto musikari elgoibartarra izango da Soran Etxean. Gaur egungo kantuak eta zaharrak jarriko ditu, gatzagarrak dantzan jartzeko asmoarekin. Horrez gain, sorpresak ere izango dituzte bertaratzen direnek.
