Mankomunitatetik atzo, martitzena, kendu zituzten orain arte herrian zeuden edukiontziak eta oraintsu egin duten azpiegituran edukiontzi berriak jarri zituzten. Atzo zabaldu zuten baita ere auzokonposta gunea herritarrendako, eta modu horretan, organikoa berrerabiltzen hasi dira dagoeneko gatzagarrak. "Ez da asko aldatzen, bakarrik organikoa hasiko gara orain bereizten eta kudeatzen. Beste atalek lehengo moduan jarraituko dute baina azpiegitura berriekin", esan du Juan Luis Zabala zerbitzu zinegotziak.
Ikastaroa
Herritarrek dituzten kezkak argitzeko, gainera, ikastaroa izan zuten. Udaletxeko osoko bilkuren aretoan egin zuten ikastaroa eta Tolosako Artelatz enpresakoek eman zuten. Herritarrek parte hartu zuten gainera ikastaroan; autokonposta egiteko ontziak nola muntatu ikasi zuten eta euren kezkak argitzeko aukera ere izan zuten.
Kubo banaketa
Ikastaroaren ostean kuboak banatu zituzten eta oraindik kuboak jaso ez dituzten herritarrek, bihar arte izango dute aukera kubo horiek jasotzeko udaletxeko hondakinen bulegoan goizeko 9:00etatik 14:00ak bitartean, eta bestela, datorren astetik aurrera udaletxean bertan jasotzeko aukera izango dute 9:00etatik 14:00etara.
Guztira, 150 kubo eraman dituzte Leintz Gatzagara 140 etxebizitzetan banatzeko eta kuboekin batera banatzen ari dira gida bisuala, autokonpostaje gida eta hiztegia.
Gaur, bideo emanaldia
Gaur, berriz, bideo emanaldia izango dute. Home izeneko dokumentala emango dute Labidea dendan arratsaldeko 19:00etan.
Zakarrontziak gaika, laster
Bestalde, herrian dauden zakarrontziak ere aldatu egingo dituzte eta gaika batzeko sistema jarriko dute horietan ere; Leintz Gatzagako diseinu berezi bat eramango dute gainera.
Bukatzeko, Juan Luis Zabala zinegotziak herritarrei mezu hau bidali nahi izan die: "Birziklatzeko garai berri baten gaude, iritsi da eguna, eta ea guztiok batera lortzen dugun beste herrietako birziklapen mailetara iristea, zero zabor filosofiarekin bat etorrita".