Dagoeneko Oñatin, Bergaran eta Arrasaten egon da erakusketa hori, eta helburua da prebentzioan eta birziklatzean aurrerapausoak ematea. Erakusketa oso bisuala da eta hiru gunek osatzen dute: batean, debagoiendarrok sortutako hondakin kopurua agertzen da; bestean, Antzuolako kopuruak azaltzen dira, lor daitekeenaren erakusgarri; eta hirugarrenean, hondakinak ez direla zaborra azaltzen dute eta gaika biltzearen onurak gogorarazi.
Konpostaren alde
Gatzagako Udalak konpostaren alde egin du eta dagoeneko jakinarazi diete herritarrei bi konpostagailu handi jarriko dituztela. Era berean, baserritarrak ere konposta egitera bultzatu gura dituzte. Hain zuzen, mankomunitatea 2005az geroztik dabil banatzen konpostagailuak eta Gatzagara 18 iritsi dira.