Jaietarako dena prest bazegoen ere, San Pedro eta Intxaurtxuetako Bizilagun Elkarteak azken unean erabaki du guztia bertan behera uztea. Ohar bidez azaldu dute, antolakuntzako kide bat "oso egoera larrian" dagoela, eta "tristura handiz" erabaki hori hartu behar izan dutela: "Badakigu erabaki honek eragozpenak sor ditzakeela eta bihotzez barkamena eskatu nahi diegu, modu batean edo bestean, erabaki honek eragiten dien guztiei. Auzokideei, laguntzaileei, taldeei, artistei, hornitzaileei eta gurekin egun hauek ospatzeko ilusioz zeundeten guztiei".
Erabakia hartzea ez dela erraza izan gaineratu dute, batez ere, jaiak antolatzen "lan eta ilusio handia jarri ondoren". Baina, une honetan,"garrantzitsuena gure kidearen eta haren familiaren ondoan egotea" dela erabaki dute. "Espero dugu gure egoera ulertu eta gure erabakia errespetatuko duzuela. Bihotzez eskerrik asko zuen ulermenagatik babesagatik eta beti gurekin egoteagatik", amaitu dute.
