Hileko bigarren zapatuetan egiten dute Xake goizak egitasmoa, eta halaxe egingo dute datozen hilabeteetan ere, 11:00etatik 13:00etara bitartean. Ander Otero da dinamizatzailea eta bi orduko saioetan, parte-hartzaileek elkarren kontra jokatzen dute Oterok laguntza ematen duen bitartean.
Gaur gaztetxoak elkartu badira ere, herritar guztiei zabaldutako ekimena da. Ez dago izena eman beharrik eta nahikoa da Xake goizak ekimena egingo den zapatu horretan liburutegira joatea. "Etortzen den jendearen aurka jokatzen dituzu partidak. Duela hilabete batzuk umeendako klaseak eman genituenez, etortzen dira gaztetxo gehiago, baina edozein adineko pertsonak etor daitezke. Gurasoak ere etorri izan dira", dio Oterok. Azaldu duenez, gaurkoan 10 lagun joan badira ere, aurreko saioan, 22 elkartu zirela.
Burua erabili beharreko kirola
Oteroren hitzetan lehendabizi ikusi behar da bakoitzak ze maila eta ze esperientzia duen, eta hori garrantzitsua dela esan du. Saiatzen da haurrei jokaldiak erakusten, baina ikusi du zenbaitek jakiten dituztela jokaldi horiek.
Onurak ere badituela adierazi du. Helburutzat finkatu ditu partaideek ondo pasatzea eta ikastea. "Askotan hitz egin dugu hemen gure garunaren sormenerako xakeak dituen onuren inguruak. Xakeak hainbat aukera ditu, eta aukera horiek irakurri eta onena aukeratu behar dut, nire posizioa onena izateko. Onuragarria da, batez ere, umeendako eta formakuntza prozesuan".
Liburutegian badago aukera astean zehar ere xakean jokatzeko. Badaude xakeari buruzko liburuak eta badaude xakean jokatzeko xake-taulak.
