Eskoriatzako Udalean euskararen erabilera normalizatzeko plana onartu zuten martxoko ohiko osoko bilkuran. Planaren helburua da Eskoriatzako Udalak euskaraz gehiago egitea eta hobeto funtzionatzea. Horrekin batera, herrira begira, Euskararen Eskoriatzako plan estrategikoa ere onartu zuten. Bi puntuak aho batez onartu zituzten Eskoriatzako udalbatzako kideek.
Udal jarduna euskaraz
"Eskoriatzako Udaleko jardunean, barrura begira, asko normatibizatu dira lan egiteko moduak, eta, neurri handi batean, euskaraz funtzionatzen dugu, gauza batzuk hobetzeko ditugun arren. Horiek jasota ditugu planean. Hala ere, erabilerari dagokionez, Udaletik kanpo lan gehiago egiteko dagoela esango nuke", adierazi du Xabi Uriartek, Eskoriatzako EH Bilduko bozeramaileak.
Estrategiak, definituta
Datozen urteotan Udalak euskararen arloan zein lehentasun izango dituen eta zer egin nahi duen markatzen duen dokumentua da, bestalde, Euskara Plana, herriko zenbait eragilerekin prestatua eta adostua. Hori horrela, herrian euskaraz gehiago egiteko asmoz, ildo batzuk definitu dituzte. Eremu estrategiko horiek honako hauek dira: haurren eta nerabeen aisialdia euskalduntzea; euskararik ez dakiten herritarrak euskarara hurbiltzea –bereziki, etorri berriak–; arlo sozioekonomikoan, merkataritzan eta ostalaritzan euskararen erabilera sustatzea; euskaldunak eta euskaltzaleak zaindu, ahaldundu eta komunitatea sendotzea; eta udal baliabideak behar berrietara egokitzea.
"Lantalde bat osatu genuen plana diseinatzeko. Galdetegi bat egin genuen, herritarren iritziak batzeko. Ondoren, herriko zenbait euskaltzale eta aditurekin, Udaleko bi teknikarirekin eta zinegotzi batekin Aholku Batzordea sortu genuen, eta hiru saio egin genituen. Aholku Batzorde horren helburua da Eskoriatzan euskararen normalizaziorako non eragin nahi den eta esfortzuak non jarri behar diren hausnartzea eta daukaguna eta izan beharko genukeena planifikatzea, eta lerro nagusi batzuk definitu genituen, plana osatzeko".
Planari jarraipena
Plan honek 2032.urterako ikuspegi jakin bat zehazten du, eta beraz jarraipena egingo diote, eta, urtero Kudeaketa Plana egingo da, urtean landu nahi diren helburuen kronograma eta egitekoak jasoz.
