Iaz, Eskoriatzako Aratuste-martitzenean Eduardo Gorosarri konpositorearen Nasteborraste izeneko pieza dantza bihurtu zuten Gorosarri Dantza Taldeko kideek. Lehenbiziko aldia izanda, dantza herritarren aurrean plazaratu zuten, eta, orduan izandako arrakastaren ostean, berriro plazan dantzatzeko dantza-ikastaroa antolatu dute.
Hiru saio eta entsegu orokorra
Gorosarri Dantza Taldeko Idoia Lahidalgak 2024an sortu zuen dantza, eta hura izango da ikastaroaren gidari. Asmoa da interesdunek dantza ikastea eta martxoaren 4an emanaldia egitea Fernando Eskoriatza plazan, eta, bide batez, herrian egiten diren gainontzeko dantza saioetara begira ere jendeak ikustea dantza herrikoia nolakoa den. Hori horrela, guztira, hiru entsegu egingo dituzte ikastarora animatzen direnek, baita entsegu orokorra ere. Hain zuzen ere, otsailaren 3an, 10ean eta 17an (astelehenak) 20:00etatik 21:00etara bitartean egingo dira saioak, Joseba Iñurrategi pilotalekuan. Entsegu orokorra, berriz, otsailaren 25ean egingo dute, martitzena, 19:00etatik 20:00etara bitartean.
Ikastaroa antolatzeko gutxieneko taldeak hamar pertsonakoa izan beharko du, eta parte hartzeko gutxieneko adina 12 urte. Ikastaroaren prezioa, berriz, bost eurokoa da, eta, izen-ematea zabalik, izena emateko azken eguna otsailaren 9a izango da. Horretarako, udal webguneko agendako estekan dagoen formularioa bete beharko dute interesdunek. Behin izena emanda, posta elektronikoz jarriko dira Gorosarri Dantza Taldekoak harremanetan interesdunekin, ordainketa egin dezaten. Hala ere, zalantzak dituenak gorosarridt@gmail.com helbidera idatzi edo 646 95 37 10 telefono-zenbakira deitu dezake. Ikastaroan batutako dirua elkartea bultzatzeko bideratuko da.
Urteko plangintza prestatzen
"Iaz egin arren, aurten arrakasta handiagoa nahi genuke. Ikasturtea aurrera doan heinean izango ditugu ekintza gehiago, baina orain saio hauetan zentratuta gaude", adierazi du Dorleta Ezeizak, Gorosarri Dantza Taldeko kideak.
