Euskal Herriko herri guztietan bezala, Eskoriatzan ere bada etxe bila dabilen gazte bat, elkarrekin alokairuan bizi diren bi gazte, etxebizitza komunitarioan bizi den bat eta etxea erosi berri duena. Horien artean bada kezka eta erronka handienetako bat emantzipazioa. Etxebizitzen prezio altuek eta soldata baxu edo mugatuek asko zailtzen dute gazteak gurasoen etxetik irtetea eta bizi-proiektu berri bati hasiera ematea. Hori dela eta, Eskoriatzako Udalak datu bilketa egin nahi du herriko gazteen egoera zein den jakiteko.
Gazteen iritzia jaso nahian
Eskoriatzako Udalak herriko gazteek etxebizitza eskuratzeko eta emantzipatzeko dituzten oztopoak ezagutzeko inkesta bat kaleratu berri du, udal webgunean jarri dutena –eskoriatza.eus–. Zehazki, 16 eta 34 urte arteko gazteen iritzi eta asmoak jaso nahi dituzte; datuak mahai gainean izanda, aurrera begira urratsak egiteko.
Gazteen iritzi eta asmoak jaso nahi dira, alde batetik. Horretarako, formulario bat dago betetzeko udal webgunean. Bestetik, lantalde bat osatu nahi dute hurrengo pausoak finkatzeko, eta, horretarako, beste esteka bat jarri dute udal webgunean, eta galdera hau proposatu: Gazteon eta etxebizitzaren arazoari aurre egiteko lantalde bat osatuko balitz, parte hartuko zenuke?
Gazteen etxebizitza beharrak jasotzeko inkesta betetzeko azken eguna domeka da
Datu horiek ez dira inkestarekin alderatuko, modu independentean jasoko dira, eta, esteka horretako formularioa beteta, datu horiek soilik lantaldearen deialdia egiteko erabiliko direla adierazi du Eskoriatzako Udalak.
Lantaldean parte hartzea
Galdetegia abiapuntua izango da etorkizunean etxebizitza-plan bat martxan jartzeko. Horrela, gazteek herrian emantzipatu daitezela errazteko, gazteen errealitatea eta beharrak aztertzea izango da lehen urratsa. Ondoren, interesa duten gazteekin etxebizitzaren arazoari aurre egiteko lantalde bat osatzea aurreikusten dute. Lantalde horrek jorratuko ditu herrian bizi ahal izateko baldintzak hobetzeko ideia eta estrategia berriak.
Modu anonimoan
Eskoriatzako Udaleko Gazteria eta Hezkuntza Sailak bideratutako galdetegia udal webgunean egongo da urriaren 6ra arte, interesa duten gazteek bete dezaten, eta ez da informazio pertsonalik batuko; hau da, inkesta anonimoa da eta erantzunak modu anonimoan jasoko dira.
