Abenduaren 4an egin zuten haurren garapenerako elkarteko kideek elkartearen gaineko aurkezpena. Ordutik hona "bazkidetza-datu apartak" lortu dituztela adierazi dute TipiTapako kideek; 28 haur eta 23 familia daude, gaur-gaurkoz.
Aurreikusi bako harrera
Euskara ardatz du egitasmoak, eta dagoeneko espazio seguru bat dute Tortolis ludotekan, Eskoriatzako zenbait familiak Gabonetan erabili dutena. Hala, egoteko espazio seguru itxi bat izateaz batera, gurasoen eta haurren arteko harremanak sendotzeko helburua ere badu egitasmoak, eta horretan ari dira. TipiTapa guraso elkartearen bultzatzailea da Maite Santamaria eskoriatzarra, eta hasierako urratsekin pozik agertu da: "Batetik, izan dugun harrera sekulakoa izan da; 23 familia batzea ez genuen aurreikusten. Bestetik, ludotekaren erabilerarekin oso-oso pozik gaude erabiltzaile guztiok. Gainera, orain, Gabonetan ludotekak ez duenez zerbitzurik eskaini, goizetan eta arratsaldeetan erabiltzeko aukera izan dugu. Zenbait helburu ditu TipiTapa guraso elkarteak, eta horietako bat da informazioa eskaintzea, elkarbanatzea, ikastea eta irakastea. Horretarako, hitzaldiak antolatzeko nahia genuen. Kontuan izanda bazkide gehienok 0-1 urteko haurrak ditugula, solido bidezko elikadura osagarriaren gaineko hitzaldiaren aldeko hautua egin dugu oraingo honetan".
BLW metodoa aztergai
Solido bidezko elikadura osagarriaren gainekoa da elkarteak antolatu duen lehenengo hitzaldia –BLW delakoa–. Ainitze Ondarra dietetikan eta giza nutrizioan graduatua izango da hizlaria, eta sarrera doakoa izango da. Bestalde, hurrengoa antolatu gabe izan arren, lehen sorospenekoa izango dela aurreratu dute.
