Bost garagardo ezberdin probatu zituzten Inkernu tabernan bertaratu zirenek, eta Bittor Barandiaranen pintxoak ere dastatzeko aukera izan zen. "Azalpen orokor bat eskaini genuen lehenengo. Garagardoren osagaiak zeintzuk diren azaltzeaz batera, malta ale batzuk eraman genituen ezberdinak probatzeko, lupuloa usaintzeko… Garagardo dastaketa praktikoa egin genuela esan dezakegu. Garagardo bakoitza azaltzeaz batera, horiek probatu genituen, eta esan beharra dago batetik bestera jateko Bittor Barandiaranek egidako pintxoak ederrak zeudela. Berak ere eman zituen pintxoen azalpenak…", adierazi du Aritz Oiangurenek, Gerrigardo garagardotegiko kideak.
Oiangurenek gaineratu duenez, oso pozik geratu dira Gerrigardo garagardotegiko kideak antolatutakoaz, eta, ez dute baztertzen aurrerago beste dastaketa bat egitea. "Inkernu tabernari eskertu nahi diogu, Bittorri eta baita bertaratu ziren guztiei. Oso giro ederra izan zen, eta, ea beste bat antolatzeko aukera dugun. Guretzat plazer bat izan da".
