Izan ere, eta hitzaldi hartan azaldu zuten moduan, "Eskoriatzak kanpoko energiarekiko duen dependentzia %98 ingurukoa da, eta pasa den neguan kanpoko energiarekiko dugun menpekotasuna eta bere prezioa hirukoiztu izanak familien ekonomian eduki duen eragina ikusi dugu".
Horren aurrean, Eskoriatzan komunitate batzuetan isolamendua edo eguzki-plakak jartzen ari dira. Eskoriatzako Jauzi Ekosozialeko kideak, bestalde, energia fakturen edo eguzki plakak komunitateetan jartzearen inguruko hitzaldiak eta aholkularitzak ematen dabiltza, eta lanketa horretan zailtasun ekonomikoak dituzten familiak ere badaudela identifikatu dute.
Arazoaren tamaina ikusita beste pausu bat emateko garaia dela deritzote: "Bestea beste, Energia Elkartea edo Komunitatea sortzeko aukerak aztertzeko prozesua herrira zabaltzen hasi gara Goienerren eskutik", azaldu du Nestor Aranak, Jauzi Ekosozialeko kideak. Azterketa hori orain hasi eta udazkena bitartean egingo dute.
Edonork prozesuan parte hartzeko edo bultzatzeko interesa baldin badu, harremanetan jartzeko posta elektronikoa zabaldu dute antolatzaileek: eskoenergia.komunitatea@gmail.com.