Euria eta giro ederra protagonista Atxorrotx Egunean

Jokin Bereziartua Lizarazu 2023ko mai. 14a, 14:32

120 bat lagun elkartu ziren herri bazkarian.

Euriaren ondorioz hasierako egitarauan aldaketak izan arren, "oso ondo" joan zen atzoko Atxorrotx Eguna Eskoriatzan. Goizean puzgarriak eta talogileak izan ostean eta Potx magoaren emanaldia izan ostean, 120 bat lagun elkartu ziren kontzejupean paella erraldoia jateko. Bazkalostea ederto girotu zuen Andoni Ollokiegi musikariak eta gauean Etxepek borobildu zuen bustia bezain beroa izan zen eguna.

Eguraldi iragarpenengatik hasiera baten aurreikusita ez zegoen Potx magoaren emanaldia izan zen, besteak beste, goizean zehar.

Potx magoa Inkernu tabernan.

Zapatuko egitarauan ere azpimarratzeko taldea ere lehenengo aldiz batu zen Eskoriatzako kaleetan, formatu berezian. Izan ere, Eskoriatzako Beheko Errota Musika Eskolako kideek sortutako Ad Libitium taldea, txaranga formatuan atera zen herriko kaleak girotzera. Adierazi dutenez, arrakasta izan zuten, eta, hurrengo hitzordua, Eskoriatza Kirol Elkarteraren egunean izango dute, maiatzaren 27an.