Denbora luzez bertan egin gabe, Eskoriatzako udalbatzako kideak martitzeneko otsaileko osoko bilkura egitera udaletxera bueltatu ziren. Gai-zerrendako puntu gehienak tramiteak izan ziren, eta Martxoaren 8a, Emakumeen Nazioarteko Eguna, dela-eta, EH Bilduk eta EAJk aurkeztutako proposamenek izan zuten garrantzia bilkuran. Udal Gobernuak aurkeztutakoa atera zen aurrera, Eudelek eskatutakoa.
"Martxoaren 8aren baitan, alderdi bakoitzak bere proposamena aurkeztu du. Guk uste dugu Eudelek planteatzen duenak lanketa handia duela, Euskal Herriko alderdi eta ordezkari politiko guztiek ordezkatzen dutelako. EH Bilduk zerbait gehiago gaineratzea planteatu du, eta uste dugu halako zerbait osoko bilkuran adostu barik, lan batzordeetan aztertu behar dela teknikarien eskutik, eta guztion iritzia kontuan hartuta. Hala ere, garrantzitsuena da denon batura adieraztea", adierazi zuen Josu Ezkurdiak, EAJ-ko bozeramaileak.
Zaintza mahaia
EH Bilduk, berriz, honako hau adierazi zuen: "Eudelen proposamena aurkeztu ziguten, eta, halakotan egiten dugun moduan, lanketa bat egin genuen herriko talde eta elkarte feministekin. Asti askorik ez, baina bi proposamen ekarri ditugu. Garrantzitsuena zaintza mahai baten eratzea da. Zaintza sistemari buruzko analisia egin eta honen konpromiso kolektiboari heltzeko estrategia publiko-komunitarioak diseinatzeko eta abian jartzeko elkarrizketarako erabakigune bat. Eta gero, ekintza zuzenak egitea ere proposatu dugu emakume, nerabe eta nesken ahalduntze indibidual eta kolektiborako ekintzak bultzatzea, tokiko eragile feministekin batera: maskulinitateari edo ahalduntzeari buruzko buruzko hitzaldiak...", adierazi zuen Eluska Irazuk, EH Bilduko bozeramaileak. [EH Bilduren proposamena]
Ekintzetan parte hartzeko deia
"Eudelek marko on bat proposatzen du, eta EH Bilduk egindako proposamenak ere oso interesgarriak dira, eta kontuan hartzekoak. Adierazi da horiek batzordeetan lantzea, eta Elizateen partetik horri forma emateko prestutasuna adierazten dugu. Esan behar da Martxoaren 8a kaleak hartzeko eguna dela, eta deialdia egiten dugu prestatuko diren egitarauko hitzorduetara animatzeko herritarrak", esan zuen Leire San Vicentek, Eskoriatzako Elizateen Elkarteko bozeramaileak.