Sari hauek jaso zituen Pablo Aguero zinemagile argentinarrak zuzendutako Akelarre filmak: jantzien diseinu onena, efektu berezi onenak, makillaje eta ile-apainketa onena, jatorrizko musika onena eta zuzendaritza artistiko onena.
Horietako batean bere aletxoa jarri du Sergio Some eskoriatzarrak. Hain zuzen ere, Jantzien diseinu onenaren Goya sarian. Arlo horretan saria Nerea Torrijos diseinatzaile bilbotarrak jaso du, eta bera izan da Sergio Some bitxigile eskoriatzarrari Akelarre pelikularako zigilueraztuna egitea eskatu ziona. Somek adierazi duenez, saria ez da berea, baina, nolabait, bere aletxoa jarri du, eta, horregatik, oso pozik dago.
Aitortzarekin "pozik"
"Pozik eta hunkituta nago Nerea Torrijosek jaso duen Goya sariarekin. Bere lanak jarraitzen ditut, eta maiteminduta nago horietaz. Profesional peto-petoa da, eta eskerrak eman nahi dizkiot, Pierre Rosteguy De Lancre Akelarre pelikulako protagonistetako batentzat enkargatu zidan eraztun-zigilua egiteko aukera emateagatik. Izan ere, bitxigile artisau gisa nire aletxoa jarri ahal izan dut horrela, eta aurrera begira bide berriak zabaldu daitezke lan honen bitartez…", dio Sergio Somek, Madrilen bizi den bitxigile eskoriatzarrak.
Bere estiloarekin bat egiten duen lana gauzatzea ederra izan dela adierazi du, eta, emaitzaz gain, prozesuan ere gozatu duela dio. "Aukera aparta sortu zitzaidan, film baterako lan bat jasota, eta esan beharra daukat mimoz egindakoa izan dela. Egin nuen zigilu-eraztuna pantaila handian agertzearekin nahikoa nuen, baina pelikulak Goya sarietan izan duen arrakasta izugarria izan da. Akelarre filma 1609an girotuta dago, eta sorginkeria du ardatz. Euskal mitologiak zoratu egiten nau, eta garai hartako jantziak, bitxiak… pila bat gustatzen zaizkit. Oso inspiratzailea izan da niretzat gai hau lantzea, eraztun-zigilu honez gain nire beste zenbait lan egiteko", dio bitxigile eskoriatzarrak.
Akelarre filmerako zigilu-eraztuna eskuz landutakoa da, argizaritan, eta urre horiz egindako akaberarekin. Hala ere, lan horrez gain, goi mailako pasareletan jarri ditu ikasgai bere lanak, eta une honetan ere baditu beste hainbat proiektu esku artean.
'Seronoser' izenpean
esteak beste, Francisco de Goyaren pintura beltzetan oinarritutako bilduma bat garatzen ari da momentu honetan, laster ikusgai izango duena. Egindako bestelako pieza eta lanak ikusi gura dituenak seronoser Instagram kontuan bila ditzake.
